Beethovengasse

Smá skýrsla

gille — Fri, 22 Dec 2006 22:04:47 +0000

Jájá, ég veit ég hef ekkert bloggað lengi! Dett stundum bara úr gír!

Það sem hefur gerst síðan síðast er alltof mikið til að tíunda hvert atriði hér. Við Alex höfðum það bara gott í desember og skemmtum okkur töluvert. Yfirleitt var Biggi vinur okkar með í för og sagði brandara.

Núna erum við hinsvegar komnir á Klakann og ég farinn norður. Verð þar til 26. des þá kíki ég smá í bæinn áður en ég fer á sjó 27. des – 30. des. Svo vona ég bara að ég hitti sem flesta vini um áramótin

Bratislava

gille — Fri, 24 Nov 2006 10:29:50 +0000

Alex, Biggi og ég skelltum okkur í smá ferðalag um síðustu helgi til nágrannaborgar Vínar, Bratislava. Þó Bratislava sé svona nálægt þá er þetta eins og að koma inn í annan heim. Við ákváðum að taka þann kostinn að fara með bát þangað og svo rútu til baka. Í bátnum þá fannst okkur tilvalið að skella í okkur einn bjór og ég var hissa hvað hann var eitthvað rammur. Leit þá á prósentuna og viti menn hún var 12. Við komumst að því síðar að það er hvergi hægt að fá undir 10% bjór í Bratislava og flestir drukku líka litla bjóra. En ekki við. Við vorum svo vanir að drekka stóra bjóra að það var erfitt að venja sig af því þótt bjórinn væri 12%. Þegar við komum til Bratislava þá hófum við leit að einhverju ódýru gistiheimili. Fundum eitt í skemmtilega niðurnýddu porti. Alexi leist nú ekkert á þetta og heimtaði að við færum á hótel. En við mótmæltum og höfðum betur. Hostel Patio skildi það vera. Enda var planið ekki að hanga inn á Hosteli allan tíman. Í stuttu máli þá var þessi ferð alger snilld. Mikið djammað og ýmislegt gert sem við munum bara eiga fyrir okkur. Get samt sagt ykkur það að við drukkum slatta af kokteilum, borðuðum steikur, hittum frænkur Bob Marley, fórum VIP á risadiskótek og……… Við vorum svo reknir á fætur eldsnemma um morguninn og gefinn hálftími til að drulla okkur út. Það hafðist. Við vorum þunnir þegar við röltum um stræti Bratislava og sumur kúguðust meira en aðrir og urðu að hlaupa inn á klóset. Svo nenntum við ekki að bíða eftir rútunni og tókum ógeðslegustu lest sem ég hef á ævinni farið í !!! Þvílík skítafýla! En við komums þó heilir á höldnu og var ekkert rænt eða pyntaðir eða neitt svoleiðis. Ehh jú reyndar var símanum rænt af Bigga en það er önnur saga

Annars er vikan búin að vera viðburðarlítil. Báðir í skólanum og höfum eiginlega ekkert gert. Í gær minnti Alex mig á að það væri nú kominn tími á að gera eitthvað saman annað en að liggja upp í sófa og horfa á video. Við fórum því í göngutúr um Schönbrunn Hallargarðinn og svo fórum við heim en ákváðum þá að skella okkur í bíó á Casino Royal. Fannst hún bara ekkert spes! Alls ekkert Bondleg En það var samt gaman að fara í bíó

Nokkrir punktar

gille — Wed, 08 Nov 2006 11:16:27 +0000

Sitthvað frá síðustu viku:

*Fórum á Íslendingakvöldið og skemmtum okkur mjög vel. Enduðum á karokíbar þar sem lagið var tekið!

*Alex búinn að vera duglegur að versla sér föt en ég haldið aftur að mér, ennþá!

*Búnir að horfa á alla 4. seríu af 24 (var aldrei búinn að sjá hana) og margar myndir

*Borðum alltof mikið. Með þessu áframhaldi og hreyfingarleysi verðum við feitir fyrir jól.

*Alex varð veikur og lá fyrir.

*Erum búnir að elda mikið af asískum mat. Kjúklingur mjög vinsæll!

*Alex búinn að fá plás í þýskuskóla og byrjar í næstu viku.

*Ég er búinn að vera of latur að æfa mig. Er að taka mig á!

*Er búinn að vera leiður yfir því að Binni dó í síðustu viku. En samt ekki búinn að fatta það. Langar í jarðaförina!

Jæja elskurnar meira hef ég ekki að segja í bili.

Ciao!

Sambýlingurinn

gille — Fri, 03 Nov 2006 16:32:47 +0000

Núna er ég búinn að hafa sambýling hjá mér í nánast viku og hefur gengið merkilega vel. Alex kom síðasta sunnudag og er búinn að koma sér sæmilega fyrir. Finnst það ótrúlega skemmtilegt að búa með einhverjum. Þó við tuðum aðeins í hvorum öðrum. Munur að þurfa að gera ekki allt einn og fá smá félagsskap. Við höfum annars bara verið mikið heima og horft á dvd. En held að Alex hafi komið með heila videoleigu! Sem er náttúrlega bara gaman. Já sem sagt ekkert merkilegt að frétta annað en þetta erum að fara á Íslendingakvöld á eftir og ég ætla að fá mér bjór

Gervihnattamóttakarinn

gille — Fri, 27 Oct 2006 22:30:44 +0000

Vá hvað ég er búinn að bíða lengi eftir þessum blessuðum gervihnattamóttakara! Loksins er hann kominn og ég hundfúll og pirraður yfir þessu. Haldið þið að ég hafi ekki valið vitlausan móttakara! Hnötturinn sjálfur er stilltur inn á svæðið sem ég var að leita eftir það er sem sagt UK eða með öðrum orðum Sky Digital. En nei ég er með yfir 400 stöðvar af rusli. Helmingurinn eru þýskar sjónvarpsmarkaðsstöðvar og restin, arabískar, franskar, spænskar og ítalskar. Örfáar enskar! Ég sem er búinn að vera svo spenntur að geta horft á enskt sjónvarp. En þessu verður reddað í næstu viku líklega. Verð bara að sætta mig við þetta í bili.

Annars fór ég í dirigent tíma í dag og gekk bara vel. Kennarinn heldur að ég geti orðið efnilegur kórstjórnandi og núna þarf ég bara að útsetja 3 lög fyrir kór. Það verður smá hausverkur en það hefst vonandi fyrir jól. Þetta er nefninlega prófverkefni. Langar jafnvel að reyna að semja eitthvað alveg nýtt við ljóð sem ég samdi. Spurning samt hvort sé hægt að kenna þessu liði að syngja á íslensku.

Dagurinn í dag var annars afslappaður. Ég hengslaðist bara heima og nennti ekki einu sinni að elda af viti. Keypti mér frosna pizzu. En það er nú líka í lagi stundum. Svo eru bara allir að djamma í kvöld en ég ætla að halda mig heima við og haga mér. Svo hins vegar ætla ég mér að skemmta mér næsta föstudag á Bjórkvöldi Íslendinga. Það er bara ekki hægt að vera þægur þá.

En jæja ætla að halda áfram að glápa á sjónvarpið. Bis später!

Ciao!

Þjóðhátíðardagur Austurríkis (Der National Feiertag)

gille — Thu, 26 Oct 2006 13:22:01 +0000

Í fyrsta skiptið síðan ég kom til Austurríkis upplifði ég Þjóðhátíðardaginn án þess að vera þunnur og hanga heima. Já batnandi mönnum er best að lifa segi ég. Annars var ég hálf ráðviltur hvert ég ætti að fara og hvað ég ætti að gera. Var svo sem ekkert búinn að kynna mér hvað væri gert hérna og hvar hátíðarhöldin færu fram. En þar sem maður býr nú alveg við miðbæinn sá ég mér þann kost skástann að labba bara út og athuga hvort ég sæi bara ekki eitthvað fólki að labba í einhverja ákveðna átt. Þar sem ég var ekkert búinn að borða ákvað ég nú að skella mér á McDonalds við Schottentor og grípa með mér eitt stykki ostaborgara. Það var sem við manninn mælt. Þarna sá ég hvert straumurinn lá. Hann lá með “hringnum” og í áttina að Hetjutorgi (Heldenplatz). Vissi reyndar að það ætti að vera einhver hersýning þar. Vissi bara ekkert hvenær. En ég rölti af stað með ostborgarann minn og stytti mér leið í gegnum Fólksgarðinn (Volksgarten). Þarna voru saman komin 30 þús manns og allir í þessu líka glimrandi skapi. Ég lét mig berast um með straumnum og endaði á prýðilegum stað. Fyrir miðju torginu. Rétt þegar ég er svo hættur að berast til með fólkinu þá byrjar þessi þungi trommusláttur og lúðrasveit og hermenn koma marserandi. Verð nú að viðurkenna að þetta var ansi tilkomumikið að sjá samhæfinguna hjá þessum mönnum þegar þeir sveifluðu byssum sínum af mikilli einbeitingu. En ég eins og aðrir hrukkum við þegar þeir byrjuðu svo að skjóta í lokinn. En það voru nú sem betur fer bara púðurskot. Þessi staður var sem sagt kynning á hernum og öllu því sem hann hefur upp á að bjóða. Þarna voru líka þyrlur, skriðdrekar, gröfur, herþota og ýmislegt tæknidót sem vakti athygli mín og annarra. Auk þess sýndu þeir á risaskjá hvernig á að vera sig. Þar var ung kona með sýnikennslu þar sem hún lumbraði á einhverjum vesalings karlmanni og fékk maður nú oft illt fyrir brjóstið að sjá hvernig hún sveiflaði honum yfir sig, kýldi hann í barkakýlið og stappaði á Mozart kúlunum. Fólki þótti þetta greinilega hin mesta skemmtun að sjá svona uppsett slagsmál og hvernig konur geta barið frá sér.

Næst rölti ég út um Borgarhliðið (Burgtor) og á Maria Theresian Platz voru hópur hippa eða eitthvað álíka að mótmæla þessari hersýningu. Mjög gaman að sjá svona andstæður hlið við hlið. Ég nennti ekkert að hlusta á það lið. Enda var graslykt í loftinu og ég hafði engan áhuga á að þefa af því. Tek samt að ég er ekkert stríðsinnaður. Finnst bara alltaf gaman að sjá flott tæki!

Ráðhústorgið (Rathausplatz) var næsti viðkomustaður á leið minni heim. Þar var einhver kynning á öryggismálum og slíku. Sem sagt slökkviliðið, lögreglan og eitthvað fleira. Nennti heldur ekkert að kíkja á það. Þannig að ég bara dreif mig heim að slaka á.

Dagurinn og skoðanir mínar á hvalveiðum

gille — Mon, 23 Oct 2006 20:51:03 +0000

Dagurinn í dag er búinn að vera ágætis törn. Vaknaði samt ekki klukkan 9 eins og ég ætlaði þar sem ég asnaðist til að vera andvaka í gærkvöldi. En svona er það nú stundum, maður nær sér bara ekki alltaf niður. Hvað með það ég fó þó á fætur um 11 leytið og var svona skítsæmilega sofinn. Druslaðist í Chorpartitur (kórstjórnunartíma) og var nú ekkert alveg að meika það. Náði ekki að einbeita mér almenninlega að öllu sem ég vildi og þó að kennarinn hrósaði mér fyrir góða tilfinningu þá náði ég því ekki fram sem ég ætlaði. Kannski ætlaði ég mér of mikið. Svo fór ég bara í hvern tímann á fætur öðrum og var ekki búinn fyrr en í kvöld. Langur dagur sem sagt í skólanum í dag.

En svo gerðust þau undur og stórmerki að ég var stoppaður tvisvar í dag í neðanjarðarlestinni. Miðaathugun! Sem betur fer hef ég lært af þeim 3 rándýru skiptum sem ég hef verið stoppaður að gleyma ALDREI miðanum aftur heima. Ég hélt kátur för minni áfram en sá nokkra óheppna baðandi höndum og reyna að leika að þeir hafi gleymt miðanum heim. Trúið mér það virkar bara ekki. Nema einu sinni hjá mér, enda afbragðsleikari. Felldi meir að segja tár og allt.

Leit aðeins við hjá Jóni í kvöld og fékk ýmsar fréttir hjá honum. Ein er sú að hann fékk tilboð um að fara í söngtúr í mánuð um Evrópu. Sem er frábært! Hann á það svo sannarlega skilið! Hvort sem hann tekur það að sér eða ekki. En eitt er víst að ég mun sakna hans í mánuð ef hann fer. Svo var hin fréttin að eldri söngvari er að segja skilið við spúsu sína og ná sér í eina yngri. Greinilegt að ég er ekki eini sem er með gráan fiðring í söngheiminum. En eftir að hafa spjallað um stund þá skelltum við okkur á frábæran stað, Ronan held ég að hann heiti, og fengum okkur Falafel og Lawasch plús arabískt brauð. Mjög kósý staður og ÓDÝR.

Á morgun bíður mín svo áfram haldandi vinna. Söngtími og fjör. En eins og ein vinkona mín sagði mér í dag. Þá á þetta að vera erfitt, en skemmtilegt, og það er það.

Annars hef ég verið að spá í að fara í líkamsrækt en veit bara ekki hvert. Held ég verði bara að hamast eitthvað líka til að líða vel. Maður verður bara allur svo mikið hressari ef maður púlar smá. Ætla samt að bíða með það þangað til Alex kemur svo við getum peppað hvorn annan upp og æft saman. Hundleiðinlegt að æfa einn!

Svo smá um hvalveiðar sem hafa verið örlítið í fréttum hér og í Þýskalandi, eins og flestum öðrum löndum. Hef enga sérstaka pólitíska skoðun á þessu þannig séð. Finnst allt í lagi að veiða hvali og það er örugglega búið að rannsaka hvort þessar veiðar séu ekki í lagi. En samt sem áður er það lítill hagnaður af þeim að það borgi sig að setja sig upp á móti flestum þjóðum heims. Þá er ég ekki bara að tala um alla þessa umhverfisráðherra og Greenpeace sem eru á móti þessu. Skítsama um þá. En maður verður sterklega var við það að fólk almennt þekkir ekki til rannsókna Íslendinga. Þetta fólk er bara fáfrótt en engu að síður mikilvægt fyrir íslenskan túrisma. Finnst persónulega að það hefði átt að fara aðeins rólegra í þetta og kynna betur hugmyndir Íslendinga fyrir heiminum áður en það er rokið af stað að veiða. Því þetta lítur bara illa út fyrir Íslendinga að virða ekki skoðanir og tilfinningar fólks víða um heim gagnvart Íslandi. Hana nú!

Ciao!

Nýtt útlit

gille — Sun, 22 Oct 2006 14:50:04 +0000

Jæja þá hef ég tekið mig til og breytt síðunni örlítið er meira að segja kominn með myndasíðu líka!

Annars er ekkert mikið af mér að frétta er bara allt við það sama. Hef bara nóg að læra og hef lítið gert annað af mér en það. Á föstudaginn kom þó Jón til mín og ég eldaði steik handa okkur. Það var alveg stórskemmtilegt. Enda finnst mér fátt annað skemmtilegra en að gefa fólki að borða. Held það sé komið frá mömmu. Biggi leit svo við og dró mig í eitthvað partý sem var þrælskemmtilegt. Alltaf gaman að kynnast nýju fólki.

Jæja ég hef ekkert meira að segja núna. Ætla að halda áfram að liggja í leti í dag!

Ciao!

Vikan sem er að líða

gille — Thu, 12 Oct 2006 21:35:47 +0000

Nú er ég kominn á fullt í náminu. Viðveran í skólanum er nú kannski ekkert rosalega mikil. Enda kláraði ég nánast allt bóklegt í náminu í fyrra. Þannig að ég er bara að klára restina af bóklegum fögum og æfa mig á daginn. Hef bara verið ansi hreint duglegur við þetta. En já um síðustu helgi þá var Bjórkvöld Íslendinga haldið eins og venjulega. Það var nú löngu fyrir séð að maður yrði ekki þurr þetta kvöldið. Enda þvílík stemming yfirleitt á þessum kvöldum. Sem sagt já ég djammaði ágætlega þá. En á Laugardaginn var mér hinsvegar boðið í afmælisveislu til Steina. Þar vantaði ekki upp á veigarnar og svolgarði ég í mig “nokkrum” glösum af rauðvíni með súkkúlaði. Það er himneskt skal ég segja ykkur. Svo enduðum við Steini, Lidia, ?, Roman og Stefan niðri í bæ þar sem fjörið hélt áfram á Schwedenplatz þangað til mér fannst nóg komið og rölti heim á leið. Vikan hefur annars liðið ansi hratt og svo sem ekkert merkilegt gerst í henni nema hvað ég hitti Möggu á kaffihúsi í gær, en hún er að æfa hérna með Piccolino óperunni. Við sátum heillengi og ræddum um heima og geyma. En í kvöld fór ég svo á einn bar þar sem var tískusýning og jazz. En margir vinir mínir frá því í Franz Schubert Kons. voru þarna saman komnir og ég þekkti flest alla sem voru að spila. Frábært að hitta þau aftur og ég lofaði að hafa meira samband en ég hef gert hingað til! Svo líður að því að ég fái húskarlinn minn. Hlakka auðvitað mikið til þess að hafa einhvern annan á heimilinu. Sé fram á að ég þrufi ekki bæði að elda og vaska upp núna!

Útsofinn og endurnærður

gille — Mon, 02 Oct 2006 19:15:04 +0000

Ég gat í fyrsta sinn sofið almenninlega út í dag. Það hefur bara held ég aldrei gerst í allt sumar og þreytan var farin að segja til sín. Þegar ég hafði rifið mig á fætur í morgun, drukkið kaffibolla og skolað af mér svitann þá dreif ég mig út í búð að versla. Enda ekkert til í ískápnum eftir langa fjarveru. Í dag var ég annars bara að slaka á og liggja í leti. Safna orku fyrir komandi mánuði í skólanum. Vil vera orðinn alveg frískur áður en ég byrja að gera eitthvað af viti. Fór svo á skrifstofuna í Konservatorium Wien og fékk gögn sem ég þurfti um innskráningu og skólagjöld. Spjallaði bæði við Direktorinn og Sekreterin og leist vel á andrúmsloftið í skólanum. Ég þarf ekkert að syngja fyrir til að komast í skólann, Rannveig garantieraði að ég væri nógu góður til að vera þarna. En þar sem ég er að breyta náminu aðeins og taka annað hvort píanónámið sem aðalfag líka eða tónlistarstjórnandann, þá þarf ég að spila fyrir Direktorinn á morgunn. Vona að ég eigu nú eftir að koma þessu verki almenninlega frá mér. Væri nefnilega alveg til í að hafa pianó sem annað aðalfag. Þá hefur það jafnmikið vægi og söngurinn. Í kvöld kokkaði ég svo bara Chili con Carne. Eldaði náttúrulega alltof mikið eins og venjulega. Hefði líkast til getað boðið 5 í mat. En það er svo sem alltaf gott að eiga afganga líka. Hef bara verið nokkuð rólegur í dag þótt ég sé dáldið stressandi yfir mömmu. Greyið er átti að fara í uppskurð í dag og ég hef ekki heyrt neitt. En það verður örugglega í lagi, við hörkum alltaf allt af okkur. En mamma láttu þér bara batna! “Sá, sem trúir á hamingjuna, er hamingjusamur”

Fr. Hebbel